fbpx

A miña primeira WordCamp e outras cousas no inicio do outono

Logo de la WordCamp Pontevedra
Share on facebook
Share on twitter
Share on linkedin
Share on whatsapp
Share on telegram
Share on email

Pilas cargadas.

Volvemos á carga logo dun período algo longo de vacacións no blogue, pero tamén preciso para ordenar ideas, rematar proxectos e coller folgos para os meses que veñen.

Refixen o meu horario e incorporei tecnoloxías para ser quen de ordenar e priorizar as tarefas do día a día. Porque ademais do traballo, resulta que collín unha serie de materias noutro ciclo formativo.

E teño pendentes outras formacións en deseño e marketing dixital. Que lío!

Non esquecín o blogue

Teño unha lista de novos artigos feita que non entra nunha folla de Word, alén doutros proxectos paralelos que verán a luz nos vindeiros meses.

Ademais, vou incorporar en breves un novo servizo a esta páxina web, relacionado coa formación. Porque logo de probar tanto presentacións grupais como individuais, vexo que é un servizo que pode aportar valor e axudar a persoas que queiran comezar ou ampliar coñecementos de WordPress e Elementor.

E de todo o que aconteceu nas últimas semanas, quería destacar un evento ao que asistín: a WordCamp de Pontevedra.

Tivo lugar esta fin de semana (do 20 ao 22 de setembro) na Facultade de Ciencias Sociais e da Comunicación de Pontevedra, cun amplo programa de máis de 28 presentacións en formato relatorio e varias mesas de traballo.

Pero comecemos polo principio…

Que é unha WordCamp?

Unha WordCamp non é máis que un evento de un ou máis días, enfocado en todo o relacionado con WordPress. Non ten ánimo lucro, está organizada pola comunidade e nela danse citas usuarios e profesionais de WordPress de todo tipo, condición e coñecemento.

O seu formato é o dun congreso con relatorios, charlas, mesas de traballo, networking… e un bo ambiente brutal!

Existen multitude de WordCamp en todo o mundo, e todas guíanse por un mesmo fío condutor: ser un punto de encontro da comunidade, aberto a todas e todos, participativo e, por que non dicilo, tamén festivo.

WordCamp Pontevedra

Foi a miña primeira WordCamp, e non sei por que non fun antes a ningunha, a verdade. Que pasada a todos os niveis. Desde o bo roio até a formación dos poñentes.

O programa oficialmente estaba dividido entre o sábado e o domingo, cunha Meetup previa o venres.

O sábado era o día forte, cun total de 29 presentacións. O domingo era o día do contribuidor, onde a xente aporta algo ao proxecto de WordPress logo de recibir todo o coñecemento do sábado.

No meu caso asistín a un total de 13 relatorios, de moi diversos temas. Desde deseño e emocións nas webs até como facer vídeos corporativos. Se tivera que destacar algunhas sería inxusto co resto, porque todas ás que asistín estiveron xenial.

Grupo de WordPress de A Coruña en la WordCamp Pontevedra
WordPreseros da Coruña na WordCamp de Pontevedra

A miña mañá na WordCamp Pontevedra

José Ramón Padrón falounos de como se organiza desde a Meetup máis pequena ás WordCamp máis grandes, Ana Cirujano explicounos o cambio de presentar as características dun servizo a presentar os beneficios e apelar ás emocións, Caribay Camacho indicounos como se debe facer unha Landing Page que cumpra o RGPD (cousa difícil, por outra banda), Pablo Moratinos explicounos como funciona Google Data Studio para presentar analíticas web e cruzar datos de múltiples fontes (vaia pasada de ferramenta), María Sáez recordounos como se constrúe unha estratexia SEO nunha pequena empresa (desde o estudo da competencia até a atracción de tráfico e as optimizacións), Jesús Amieiro ensinounos como automatizar tarefas (eu considero que a palestra non era nivel medio como se indicaba, senón avanzado).

Comida… e seguimos

Cun formato máis reducido e dinámico, Begoña Estévez presentounos como pasou de escribir un blogue por ocio a que este sexa a parte central do seu negocio, David Viña comentounos os erros cometidos que el considera que lle levaron a fracasar como freelance (moi recomendable para os que estamos comezando), Pilar García ensinounos como obter estratexias e respostas SEO manexando ferramentas de Google, Laura Fernández explicounos como desenvolver temas de WordPress partidos en diferentes partes para favorecer a edición e Francesc Barbero mostrounos como facer diferentes tipos de vídeos corporativos.

E así foi a miña tarde

Na recta final da WordCamp, Marta Torre e Noa Ferreirós ensináronnos cales son as fases que elas teñen no trato co cliente e dos seus desenvolvementos web, Antonio Cantero falounos de funís de venda en WooCommerce e de métodos de personalización do checkout e retención do cliente, e finalmente Fernando Tellado presentounos os seus maiores erros nunha década facendo webs.

Fernando Tellado hablando en la WordCamp Pontevedra
Tempo adicado VS resultado final

Como podes ver, xornada completiña, verdade? E a todo isto súmalle almorzo, comida e café de media tarde. Breve paso polos postos dos patrocinadores (con desconto incluído en Dinahosting e dominios .GAL) e moito bo roio.

O domingo, por desgraza, non puiden estar.

Podes ver todas as presentacións desta e doutras WordCamps en WordPress.tv.

Conclusión

Non volvo perder unha WordCamp.

Pilas cargadas, tarefas ordenadas e moitos artigos no forno.

Unhas ganas tremendas de colaborar máis na comunidade de WordPress, nos foros e no Slack de traducións ao galego (a ver se me poño dunha vez).

Máis ideas para avanzar no meu proxecto dixital.

Con todo isto, non te animas a instalar o teu propio WordPress?

Bo comezo de outono!!

PD. Mentres que escribía este artigo, chegou un email cunha enquisa de valoración da WordCamp Pontevedra. Xa o digo aquí: excelente!

Comparte :)

Share on facebook
Share on twitter
Share on linkedin
Share on whatsapp
Share on telegram
Share on email

Deixa un comentario



2 comentarios

    • Pois si, a min encantoume a experiencia tanto das charlas como da experiencia compartida entre todos. Vémonos na seguinte Meetup!

Isto é para ti!