Sabes que é o arquivo .htaccess? E para que serve nos servidores? Como lle afecta o arquivo .htaccess a WordPress?
Hoxe traio un artigo algo máis curto do habitual e tamén algo máis técnico, pero que trata dun tema que ten certa importancia se estás a deseñar ou administrar a túa web con WordPress.
Existen moitas configuracións e moitísimas opcións posibles para incluír no .htaccess, pero esta entrada non ten por obxectivo explicarchas todas. Todo chegará, pero aínda non.
Hoxe imos cunha introdución.
Que é o arquivo .htaccess?
O arquivo .htaccess é un arquivo de configuración dos servidores web Apache e outros servidores compatibles.
Ou máis sinxelo.
Un servidor é un software, un programa informático, que recibe, procesa e xestiona todas as peticións e encárgase de enviar unha resposta que ti podes ver no teu navegador. Apache é un tipo de servidor web concreto de código aberto.
Polo tanto o arquivo .htaccess modela e configura funcionamentos que ten ese servidor web. Como podes ver é un arquivo que ten bastante importancia.
Non é un arquivo propio de WordPress, pero si está presente en todas as súas instalacións, cunha gran cantidade de usos e funcionalidades.
Como se edita?
O arquivo .htaccess sitúase na raíz da instalación de WordPress. O arquivo mostrase cun punto ao principio e pode estar oculto en moitas visualizacións, polo que dependendo desde onde esteas buscando terás que configurar ‘mostrar os arquivos ocultos’.
Podes acceder a el mediante un cliente FTP como Filezilla, desde o explorador de arquivos do CPanel do hosting ou desde múltiples plugins como Htaccess Editor (programado especialmente para isto) ou Yoast SEO (é unha das súas múltiples funcionalidades).
É un arquivo moi delicado e potente. Pódense xerar erros de sintaxe moi facilmente. Un punto mal colocado, un espazo de máis ou de menos e o funcionamento pódese voltar inestable ou erróneo. Por iso é moi recomendable ter a man unha copia de seguridade antes de realizar ningún cambio.
.htaccess por defecto
O arquivo .htaccess de WordPress xa ten valores por defecto, culpables de poder ter un sistema de URL amigables.
Que é unha URL amigable? Unha dirección web relativamente curta e lexible para o usuario e para Google, coa que sexa sinxelo identificar onde estamos.
Por exemplo, non é o mesmo https://www.anxosanchez.com/?p=935 que https://www.anxosanchez.com/gl/optimizar-imaxes-web-3-pasos/ verdade? Pois ambas son a mesma entrada do blog.
Esta é a pinta do arquivo por defecto. E o que tes que ter a man por se tes que restituílo e non podes acceder ao panel de administración do WordPress a cambiar as ligazóns permanentes.
# BEGIN WordPress
<IfModule mod_rewrite.c>
RewriteEngine On
RewriteBase /
RewriteRule ^index\.php$ - [L]
RewriteCond %{REQUEST_FILENAME} !-f
RewriteCond %{REQUEST_FILENAME} !-d
RewriteRule . /index.php [L]
</IfModule>
# END WordPressAntes de finalizar déixoche a ligazón á documentación oficial de WordPress sobre o .htaccess.
